जरी वाटते मज

जरी वाटते मज तुला मी पहावे
कीती पाहण्याचे बहाणे मिळावे
कधी वाटते की तुलाही कळावे
कसे सांगण्याचे तराणे जुळावे

मी समजावे तुजला, तुला मी कळावा
ना प्रेमात जरी तू जरा आवडावा
अधरांत तुझिया जे गीत असते,
त्या गीतात माझे रहाणे असावे

तू सामोरी येता जे ओठांत अडती
ते पुढच्या श्वासाला नयनी उतरती
तू डोळ्यांतले गीत वाचावे अथवा
निशब्दांस स्पर्शाचे गाणे सुचावे

तुला ना समजती माझे बोल सारे
की समजूनही सर्व माझे इशारे
मला तू झुरवण्या जराशी भुलवण्या
उगा शब्द खेळत उखाणे म्हणावे

कधी एकला मी वळणी उभा अन्
तुझी भेट व्हावी थांबावा क्षण
नयनांत तुझिया होकार यावा
मिठीला क्षणांचे न जाणे कळावे

-------------------------- जगदिश